Монгол Улсын Компанийн тухай хуулийн 79 дүгээр зүйл, Сангийн сайдын 2014 оны 140 дүгээр тушаалаар батлагдсан “Монголын Хөрөнгийн Бирж” ТӨХК-ийн Төлөөлөн удирдах зөвлөлийн хараат бус гишүүнийг сонгон шалгаруулах, томилох журам”-ыг үндэслэн “Монголын Хөрөнгийн Бирж” ТӨХК-ийн Төлөөлөн удирдах зөвлөлийн хараат бус гишүүнийг сонгон шалгаруулах орон тоог зарлаж байна.

СОНГОН ШАЛГАРУУЛАХ ХАРААТ БУС ГИШҮҮНИЙ ТОО: 3

 

ТАВИГДАХ ШААРДЛАГА:

1. Банк, санхүү, эдийн засаг, хууль эрх зүйн аль нэг мэргэжлийг эзэмшсэн /зэрэг цолтой/, тухайн салбараар мэргэшсэн байх;
2. Англи болон Монгол хэлний бичгийн болон ярианы өндөр ур чадвартай байх;
3. Өмнө нь үндэстэн дамнасан томоохон хэлцэл дээр ажиллаж байсан туршлагтай бол давуу тал болно;
4. Сүүлийн 3 жил “Монголын Хөрөнгийн Бирж” ТӨХК-ийн эрх бүхий албан тушаал болон зөвлөх, хүний нөөц, шагнал урамшуулал хариуцсан ажилтнаар ажиллаж байгаагүй, одоо ажилладаггүй, мөн бизнесийн хэлхээ холбоогүй байх;
5. Компанитай нэгдмэл сонирхолтой болон компанийн үйл ажиллагаанд оролцогч талуудын /хувь эзэмшигчид, хувьцааны багцыг эзэмшигч, тухайн салбарын төрийн өмчит болон төрийн өмчийн оролцоотой хуулийн этгээдийн төлөөлөн удирдах зөвлөлийн гишүүн, хамтран ажиллагсад г.м/ ашиг сонирхлыг төлөөлдөггүй байхаас гадна бизнесийн аливаа холбоогүй байх;
6. Компанийн Төлөөлөн удирдах зөвлөлийн бусад гишүүн, гүйцэтгэх удирдлагын багийн гишүүд болон хяналтын багц эзэмшигчтэй нэгдмэл сонирхолтой этгээд, төрөл, садангийн холбоогүй байх;
7. Компанийн томоохон харилцагчийн хяналтын багц эзэмшигч, эрх бүхий албан тушаалтан биш байх /нэг жилд тухай харилцагчтай хийсэн хэлцэлийн нийт дүн нь компанийн нийт активын 10-аас дээш хувьтай тэнцэж байвал томоохон харилцагч гэж үзнэ/
8. Нэр дэвшигч өөрөө болон түүнтэй нэгдмэл сонирхолтой этгээд нь компанийн Төлөөлөн удирдах зөвлөлд бие даан нэр дэвшүүлэх эрх олгохуйц хувьцааны багцийг эзэмшдэггүй байх.

 

ТАВИГДАХ ШАЛГУУР:

1. Өөрөө, эсхүл нэгдмэл сонирхолтой этгээдтэй хамтран компанийн энгийн хувьцааны таваас дээш хувийг эзэмшдэггүй байх;
2. Өөрөө, эсхүл нэгдмэл сонирхолтой этгээд нь компанийн болон компанийн оролцогч нь болж байгаа компанийн нэгдлийн бусад оролцогчид эрх бүхий албан тушаал эрхэлдэггүй байх;
3. Төрийн үйлчилгээний албанаас бусад төрлийн төрийн алба хашдаггүй байх;
4. Тодорхой албан тушаал эрхлэх, эсвэл үйл ажиллагаа явуулах эрхийг нь шүүхийн шийдвэрээр хасаагүй, эрүүгийн хуульд заасан онц гэмт хэрэг үйлдэж шүүхээр ял шийтгэл хүлээлгээгүй байх;

БҮРДҮҮЛЭХ МАТЕРИАЛ:

1. Сонгон шалгаруулалтанд оролцох хүсэлт
2. Өөрийнх нь тухай өөрийг нь сайн мэдэх хоёр хүний ажил байдлын талаарх тодорхойлолт
3. Анкет
4. Боловсролын диплом, үнэмлэх
5. Иргэний үнэмлэхний хуулбар
6. Нэр дэвшигчид тавигдах шаардлагыг хангасан гэдгийг нотлох баримт бичиг, баталгаа

СОНГОН ШАЛГАРУУЛАЛТЫН МАТЕРИАЛ ХҮЛЭЭН АВАХ ХАЯГ:

Монгол Улс, Улаанбаатар хот, Чингэлтэй дүүрэг, Чингисийн талбай 3, “Монголын Хөрөнгийн Бирж” ТӨХК-ийн байр, 3 давхар, /Хуульч, Төлөөлөн удирдах зөвлөлийн Нарийн бичгийн дарга Б.Баярцэцэг Утас:313511-113, 99197178, 99688669/

 

МАТЕРИАЛ ХҮЛЭЭН АВАХ ХУГАЦАА:

Сонгон шалгаруулалтанд орох иргэний баримт материалыг 2014 оны 07 дугаар сарын 22-ны өдрийн 17:00 цаг хүртэл хүлээн авч бүртгэнэ.

Сонгон шалгаруулалттай холбоотой дэлгэрэнгүй мэдээллийг www.mse.mn, www.mof.gov.mn сайтнаас үзнэ үү.

Сонгон шалгаруулалтыг 2014 оны 07 дугаар сарын 31-ний өдрийн дотор зохион байгуулна. Зөвхөн тавигдах шаардлага хангасан хүмүүстэй эргэж холбоо барина.