Энэ сарын 3, 4-ний өдрүүдэд “Чингис” зочид буудалд болж өнгөрсөн “Trade Mongolia 2011” форумд оролцогчдод Монголын Хөрөнгийн Бирж /МХБ/-ийн Ерөнхийлөгч Билл Горман мэдээлэл хийж илтгэл тавилаа. Тэрээр илтгэлдээ Лондонгийн Хөрөнгийн Бирж /ЛХБ/-ийн менежментийн баг МХБ–ийн бүтэц зохион байгуулалтын шинэчлэлийг хийж гүйцэтгэсэн бөгөөд цаашид Монгол улсын хөрөнгө оруулагчид ЛХБ болон Торонтогийн Хөрөнгийн Биржийн арилжаанд шууд оролцох боломжтой болох талаар дурдсан байна. Түүнчлэн тэрээр “Үйл ажиллагааны шинэчлэлийн нэн тэргүүний чухал хэсэг бол арилжааны зарчим, нягтлан бодох бүртгэл болон дилерийн үйл ажиллагаа юм. Хамтын ажиллагааны гэрээний хөтөлбөрийн дагуу энэ оны 12 сар хүртэл МХБ-ийн ажилтан мэргэжилтнүүдийг сургалтанд хамруулахаар ажиллаж байна.” гэлээ. Зарим нэгэн шаардлага хангахгүй хууль тогтоомжууд Лондонгийн хөрөнгийн биржийн багийн үйл ажиллагаанд хүндрэл учруулж байгаа тул Монгол улсын Засгийн газрыг энэ асуудалд дорвитой алхам хийхийг тэрээр хүссэн байна.